Baldaŭ Karu komencis korespondi kun Aka Cio, la filino de korespond-amikino de S-ro Petro Selo.

Ankaŭ Tambu trovis korespond-amikon. Lia amiko, Troba Doro, vivas kune kun aliaj ge-esperantistoj en 'Bona Espero'. 'Bona Espero' estas nomo de Esperanto-komunumo en Brazilo. Tie loĝas kaj laboras esperantistoj. Ĉio en la komunumo apartenas al ĉiu persono, kiu loĝas tie; ĉiu manĝaĵo, ĉiu trinkaĵo, ĉiu arbo, ĉiu besto, ĉiu kampo. Tial ĉiu laboras por ĉiuj. Troba havas nek patron nek patrinon. Li estas orfo. Kelkaj aliaj infanoj en Bona Espero estas orfoj, sed ne ĉiuj.

'Bona Espero' estas en Brazilo. Brazilo estas en  Sud-Ameriko. S-ino Marga Rino havas korespond-geamikojn en Azio, Eŭropo kaj Afriko; Karu havas korespond-amikinon en Aŭstralazio kaj Tambu havas korespond-amikon en Ameriko. Inter si, ili havas korespond-geamikojn en ĉiu kontinento!