Dankon. Mi komprenas, ke Sinjorino Cip Selo estis ĉiam okupita.

Jes. Daŭre okupis ŝin ŝiaj ŝat-okupoj. Tiel, ke ŝi ne havis tempon studi Esperanton. Ŝi tamen studis aliajn aferojn, kaj ŝia plej ŝatata stud-objekto estis historio.

Mi memoras! Ŝia patro instruis historion, ĉu ne?

Jes, vi pravas. Ĉu plaĉus al vi ekscii, kial S-ro Manda Rino eklernis Esperanton?

Mi petas!

S-ro Manda Rino estas profesia ĵurnalisto. Tio signifas ne ke li vendas ĵurnalojn, sed ke li faras fotojn kaj verkas raportojn por ĵurnalo. Li laboras por tre grava ĵurnalo, kaj ofte li devas veturi al aliaj partoj de la lando, kaj resti for de sia hejmo dum pluraj tag-noktoj.

Li multe laboras kaj ŝatas sian laboron, sed li ne tre ŝatas resti dum longa tempo for de sia hejmo. Li estas bona kaj diligenta ĵurnalisto, kaj li devas iri tien, kie okazas interesaj aferoj, ĉar ĵurnal-legantoj ŝatas legi pri interesaj aferoj kaj vidi fotojn pri ili.

S-ro Manda Rino faras tre vidindajn fotojn kaj verkas legindajn raportojn. Tial, kiam okazas io aparte interesa en alia lando, li devas iri for de sia hejmlando kaj veturi eksterlanden, sed liaj edzino kaj filo devas resti hejme.